MIZORAM THALAI KRISTIAN PÂWL

ORGANISER REPORTS: 2017-2018

Mizoram Thalai Kristian Pâwl Rorêlna Vawi 64-na Palai duhawm tak takte, Mizoram TKP aiawhin kan Lalpa Isua Krista hmingin chibai ka bûk a che u. Mizoram Thalai Kristian Pâwlah hian member 45058 kan awm a, Hmeichhia 17158 leh Mipa 27900 kan ni. Pastor Bial 84-ah Unit 415 kan awm. Kumin 2017-2018 chhûnga MTKP rawngbâwlna tlângpui kan thlîrho ang a, BCM style pângngaiin thuang thum rawngbâwlna ruhrel, Thuhril (kérugma), Inpâwlho (koinónia) leh Thil tih (diakonia) zuiin report hi buatsaih a ni.

1. MISSION RAWNGBÂWLNA (kérugma):

1.1. BCM Mission Support pêk zêl a ni.

MTKP chuan kum tin BCM Mission Department-ah support a chhûng lût thîn a, kuminah hian ` 170000/- a ni. Tin, Bial leh Unit hrang hrangin Mission Support hi an pe a, Support pe hi kum tinin an pung deuh deuh zêl a ni. Kuminah hian Pastor Bial 80 leh Unit 271 ten BCM Headquarters-ah chhûng lûtin Missionary kan support mêk.

1.2. TKP Ramthim Ni 2017 Lunglei khaw chhûng Unit hrang hrangte hmanpui an ni.

Kum 2017 chhûnga TKP ni pawimawh pahnih, TKP Ramthim Ni leh TKP Day chu MTKP hruaituten insem darhin Lunglei khaw chhûng Unit hrang hrangte hmanpui a ni a. Lunglei khaw chhûng Pastor Bial 11-a Unit thlan chhuah pakhat theuhte chu TKP Ramthim Ni hmanpui an ni a. Thiam taka min lo lâwmin hun tha tak te min lo pe hlawm a. A zawngchhang tlâk hle dâwnin a lang.

1.3. Missionary chhawmdâwl ngaite tanpui an ni.

MTKP hian kum tam tak chhûng chu TKP Ramthim Ni thawhlâwm tling khâwm atangin Missionary dam lo leh chhawmdâwl ngaite tanpui nân Mission Relief a lo sem thin a. Nikum lamah erawh kum dang ang lo deuhvin Bengal Field chhûng Sikkim-a Tinkitam Biak In sak nân sum hi pêk a ni. Kumin hian BCM Mission Department hotute nên inrâwn tlângin Missionary chhawmdâwl (relief) tûr thlan chhuah an ni a. An dinhmun leh harsatzia ang zêlin tanpuina pêk an ni.

1.4. Missionary Kai, Tlabungah Tawngtaina In sak a ni.

Mizorama Chanchin Tha rawn thlentu kan Zosâp Missionary pahnih, Sâpupa leh Pu Buanga te kum 1903-a Mizoram chhim lam an rawn chuan chhuah tuma leilung an rawn rah hmasak berna, Missionary Kai, Tlabungah Tawngtaina In sak a ni a, a sak hna hi TKP Tlabung Pastor Bialin ngawrh takin a thawk a ni. He in sakna sum mamawh hi Mizoram Sawrkâr Trade & Commerce Department leh Rural Development Department atang tein hmuh a ni a, hlêp awm ang ang chu Inkhâwmpui Organising Committee Tlabung kutah hlan a ni ang.

1.5. Thalai Êntu Missionary-te lâksak vek an ni.

MTKP Official Organ pawimawh, thla kip chhuak chanchinbu, Thalai Êntu chu BCM Missionary zawng zawngte a thlâwnin thawn chhunzawm zêl a ni a. Hei hian TKP member-te leh kan Missionary-te a thlun zawm tlat a ni.

1.6. Mizorama Chanchin Tha lo thlen kum 125-na (Quasquicentennial) lawmna atân hmalâk mêk a ni.

Mizoram Baptist Kohhranin Mizorama Chanchin Tha lo thlen kum 125-na (Mizoram Gospel Quasquicentennial) January 11, 2019-a lo thleng tûr lawmna atâna tih tûr thenkhat MTKP kuta a dah chu ûm zui a ni. BCM Assembly 2017 duh dân zuiin hmalâkna tûr thuang thum duan a ni a, Budget ` 64,70,000/- ruahman a ni. Hetiangin:

1. Souvenir: II. Events: III. Competitions:

1.1. T-Shirt 2.1. Quiz (Lli) 3.1. Hla Inphuahsiakna

1.2. Pen 2.2. Talk show (Azl) 3.2. Essay Inziaksiakna

1.3. Memento 2.3. Concert (Kol/Azl/Siah)

1. KOHHRANA RAWNGBÂWLNA (koinónia):

2.1. Bial TKP Office Bearer boral chhûngte tuarpuina thu thawn a ni

January 13, 2016-a min boralsan tawh leh MTKP Rorêlna 2017-a kan sûn tâk Upa K. Rongênga, Senior Adviser, TKP Hnahthial South Pastor Bial thihna chungchângah a nupui Pi P.L. Lianbuangi te chhûngkua, BCM Model Hnahthial chu MTKP hmingin tuarpuina lehkha thawn an ni.

2.2. Term laklawhah Treasurer inthlâk a ni.

Nl./Pi Malsawmtluangi, Treasurer, MTKP chuan May 25, 2017-a Kohhran Dân Puitlinga pasal, Dr Joseph Vânlalhruaia a neih tâk avângin MTKP-a a rawngbâwlna chanvo chu thawk chhunzawm lova chawlhsan a rawn dîl a. A dîlna hi pawmin Executive Committee chuan lawmpuina thilpêk (Present) leh thuziak (Citation) nên a thlah liam a, a hum ruak luah tûr hian July 6, 2017-ah inthlanna a buatsaih nghâl a, Executive Committee Member zînga mi Pu Lalnuntluanga chu duh taka thlan tlin a ni. Ani hian July 7, 2017 khân Treasurer kal chhuak hnên atangin charge a la a, term kal laiah hun chanve a la kal liam loh avângin tûna Treasurer hna a chelh hun chhûng hi term puitlinga chhiar tûr a ni ang.

2.3. TKP Hla inphuahsiakna buatsaih a ni.

Rorêlna 2017 thu ûm zuina a ni a, TKP hming, thutiam, din chhan leh rawngbâwlna behchhan hla inphuahsiakna buatsaih a ni. Hla 28 lai a lo lût a, hla phuahtu zawng zawngte hnênah MTKP chuan lâwmthu a sawi a ni. Endiktu (Judge)-ten uluk taka an en dik hnuah lâwmman dawngtute chu hêngte hi an ni:

1) Pakhatna (` 10000/- & Citation): David Lalremruata, Rawpui Unit.

2) Pahnihna (` 8000/- & Citation): P.C. Lalchunglûra, Chânmari Vêngthlang Unit.

3) Pathumna (` 6000/- & Citation): Lalbiakzuala Râlte, Lunglâwn East Unit.

4) Consolation (` 3000/- & Citation): Lâwmsiama Râlte, Zotlâng North Unit & Nundika/Têmi, Chawlhhmun Unit.

2.4. Financial management hmasâwnna tûrin hmalâk a ni.

Sum vawn leh enkawl (financial management) chungchângah hma kan sâwn zêl theih nâna ruahmanna Organiser-in a lo duan chu thlîrhovin Executive Committee (Meeting No. 6/2016-19 dated 22-02-2017) chuan a pawm a. He hmalâkna hi hma kan sâwnpui hle a, Finance Secretary leh Circulation Manager Statements-a a lan angin Pastor Bial hrang hrang atanga sum chhûn luh thuah pawh hma nasa takin kan sâwn a ni. Hmalâkna ruahmanna (Action Plan) tlângpui chu hetiang a ni:

1. a) Monthly Closing of Account.
2. b) Quarterly Circulations of Financial Statements.
3. c) Circular to Pastorate Secretaries & Treasurers.
4. d) Annual Auditing latest by mid-January.

2.5. Thalai Êntu sum dinhmunin hma a sâwn hlek.

Tûn hma thang khat lian liam taa kan hruaitu hmasate hunlai chuan Thalai Êntu hi MTKP phurrit pakhat a ni. Leiba chêng tam tak nên an kal hrâm hrâm a, beidawngin lo tâwpsan mai pawh ni se an demawm hauh lo vang tih tûr khawpin sum dinhmun a chhia a ni. Tûn hnaiah erawh chuan balance nuai têl zet mai kan nei thei ta a, a kum têlin a pung ve zêl rih a ni. Pathian hruaina a ni a, hemi kawnga Pathian hmarua ropui tak chu ‘Thalai Êntu Missionary Lâksakna’ hi a ni. MTKP hian Thalai Êntu hi a thlâwnin Missionary zawng zawng kan pe a, anni kan duhsakna avânga sum lo lût hian Thalai Êntu management hi a vawng lêt ve thung a ni. Chuti ni suh se tûn hma ang thova phâng reng tûr kan ni. Tin, tûnhnaia India sawrkârin direct tax a lâk tan Goods and Services Tax (GST) avâng hian chanchinbu chhuahna sênso hian sân lam a pan ve zêl dâwnin a lang a, i tang mar sauh sauh ang u. Kumin 2017–18 a Thalai Êntu sum dinhmun (audited statements) chu hetiang hi a ni:

Opening Balance : ` 7,43,769.00

Current Receipt : ` 10,18,381.00

Total Receipt : ` 17,62,150.00

Total Payment : ` 9,98,156.00

Balance : ` 7,63,994.00

2.6. FOD Inkaihhruaina siam that (Amend) a ni.

FOD Inkaihhruaina Bung 12:23(1), Inkaihhruaina siam that dân (Amendment) chungchânga MTKP Rorêlna 2017 thu passed, “Inkaihhruaina siam that duhte chuan siam that an duh lai leh siam that an duh dante chiang taka ziakin MTKP Inkhâwmpui kuma rorêlnaah an theh lût ang,” tia siam that rawtna chu Fellowship Organisations Committee (FOC)-ah thlen a ni a, FOC hian a ngaihtuah hnuah a kalphung tûr ang takin BCM Central Committee-ah a thlen chho leh a. MTKP Rorêlna thu thlen chu BCM Constitution & Rules-in thuneihna a pêk anga siam danglamin hetiangin a siam tha (amend) a ni:

BUNG – 12: 23. INKAIHHRUAINA SIAM THAT DÂN [Fellowship Organisations Department, INKAIHHRUAINA DÂN (2015 Edition), Phêk 30.]

Tûna a awm dân:

(1) Inkaihhruaina siam that duhte chuan siam that an duh lai leh siam that an duh dante chiang taka ziakin MTKP rorelnaah an thehlut ang.

Siam that dân:

(1) Inkaihhruaina siam that duhte chuan siam that an duh lai leh siam that an duh dante chiang taka ziakin kum nga dan (every fifth year)-a MTKP rorelnaah an thehlut ang.

Hetiang chiah hian Baptist Kohhran Hmeichhe Pâwl (BKHP), INKAIHHRUAINA SIAM THAT DÂN (BUNG – 12: 24, Phêk 60) pawh hi siam that a ni. Hetiangin:

(1) Inkaihhruaina siam that duhte chuan siam that an duh lai leh siam that an duh dante chiang taka ziakin kum nga dan (every fifth year)-a MBKHP rorelnaah an thehlut ang.

He dân siam that hi Central Committee-a rêl a nih ni atang hian hman tan nghâl niin Inkaihhruaina siam that leh theih hun hmasa ber chu kum 2022 Rorêlnaah a ni dâwn a ni.

2.7. TKP Day thawhlâwmin Kohhran chhawmdâwl a ni.

TKP Day 2017 thawhlâwm tlingkhâwm atanga eng emaw zât chu kan dinchhan Kohhran tân hetiang hian pêk a ni:

1) BCM Biak In Salem, Aizawl sak tanpui nân ` 50,000/-

2) BCM Biak In, Brigate sak tanpui nân ` 50,000/-

3) NEICCYA Silver Jubilee lawmna tûr pualin ` 10,000/-

2.8. TKP Ramthim Ni leh TKP Day 2018 thupui vuah a ni.

TKP Ramthim Ni leh TKP Day 2018 thupui tûr chu thlang felin Ni Pawimawh Programme 2018-a chuang tûrin Order of Service leh tawngtairual thupui te nên Worship & Music Committee lamah theh luh a ni:

TKP Ramthim Ni 2018: “Krista aia palai” (Ambassadors for Christ), II Kor 5:20.

TKP Day 2018: “Pathian chung lam koh chhan” (The high calling of God), Phil 3:14.

Hetih rual hian Ramthim Ni lo chhuah dân chungchânga BCM Ni Pawimawh Bu/Ni Pawimawh Programme-a thu felhlel deuh awm thin pawh siam thatna thu Worship & Music Department-ah thehluh a ni, hetiangin: “May 29 hi BCM Missionary Mizoram pâwna tirhchhuah hmasak ber Rev H. Rokhama te chhûngkua an thawhna hmun tûr pana an pên chhuah hunlai denchhena ruat a ni”.

2.9. Kâwlchawkaia MTKP thuziak târ (hoarding) siam that a ni.

Kâwlchawkaia MTKP thuziak târ (hoarding) ‘Pathianin a hmu reng che’ tih chu MTKP aiawhin Lawngtlai Area TKP-ten chei thar hna an thawk a, mawihnai taka siam that a ni ta. LATKP te inpêknaah MTKP chuan lâwmthu a sawi a ni.

2.10. Property tihchangtlun hna thawh zêl a ni.

Office computer (laptop) hmanlai chu a chhiat avâng leh repair mai theih nia a thiamten an sawi loh avângin a thar lei a ni. Tin, Organiser luah thin MTKP Golden Jubilee Building (BCM Qtrs.No.18) pawh chei thata tuaihnûm chhunzawm a ni a. BCM Property Department zai ngaia kal ngai a nih avângin erawh tûl hrang hrang hi a tahtawlin tih thin a ni a, hmabâk tam tak a la awm ang. Organiser (designated) quarters-a motor dahna in (garage) pawh tlabalin a him lo hle a, a thar sak a ni. Sum indaih tâwk lohna kârah vânneihthlâk takin TKP Khawmawi Unit ten sênso tlêm têin a châk min ngaihtuahsak a, TKP Kikâwn Unit leh MTKP Executive Committee member-ten hnatlângin an sa thung a ni.

2.11. MTKP Hruaitute kum tluanin an fehchhuak

Kumin hian tlâng hrang hranga TKP te kankuah leh BCM pâwn lama MTKP aiawha palaiin tum 31 fehchhuah a ni a, chu chu chawhrualin thla khata vawi 3 vêl a ni. Budget tlêm tê nên hetiang taka pên chhuah a nih theihna kawngah MTKP-a kan hruaituten an sum leh pai sêngin an lîrtheite an hawl chhuak reng thîn tih hi member-ten hriatpui ila, an inpêknaah lâwm nachâng i hria ang u. BCM huang chhûnga Palaina zawng zawng hi tum 26 a ni a, Headquarters Area-ah 13, Lawngtlai Area-ah 3 leh Aizâwl Area-ah 10 a ni. Tin, Mizoram Kohhrante kan chak tâwk loh fona, kan Kohhran huang pâwn leh kan ram pêla rawngbâwlna hi hautak deuh mahse a theih ang angin ngaihpawimawh a ni a. Kumin chhûng hian Mizoram pawn lamah rawngbâwlin tum 5 feh chhuah a ni, chûngte chu:

1. a) BYFI Executive Committee Meeting, 28 February 2017, SCEPTRE, Kolkata.
2. b) North East India Christian Council Youth Assembly (NEICCYA) 17th Biennial Conference, 19-21 May 2017, Diwon Presbyterian Church, RiBhoi Presbyterian Synod CE Union, Meghalaya. Rbt. H. Lalthangliana, Vice President chu NEICCYA President niin organising tûl hrang hrang buaipuitu a ni a, Rev. Lianchhûnga Khiangte, Organiser chu speaker pakhat niin MTKP hruaitu thenkhat leh Aizâwl Area Baptist Choir ten an tawiâwm.
3. c) Nagaland Baptist Church Council (NBCC) Youth Triennial Conference cum 33rd Annual Session, 13-15 October 2017, Tseminyu Town Baptist Church. Rev. Lianchhûnga Khiangte speaker a ni a, Upa Lalmuanawma Sailo leh Nl. Rosy K. Remsângpuii ten an tawiâwm.
4. d) National Baptist Youth Leaders’ Summit (NBYLS), 26-29 October 2017, GCC Hotel & Club, Mumbai. MTKP atangin hruaitute leh zaipâwl mi 25 kan tel. Tv. Krista Roluahpuia, TKP Mualbu (L) Unit chu Facilitator pakhat a ni a, hun tha takin a hmang.
5. e) Tripura Baptist Youth Fellowship (TBYF) Annual Executive Committee Meeting & Leadership Training, 13-14 December 2017, Agartala. Rev. Lianchhûnga Khiangte chu Resource Person a ni.

2.12. MTKP Inkhâwmpui 2019 inbuatsaihna tluang takin a kal zêl.

MTKP Inkhâwmpui 2017 inbuatsaihna tluang takin a kal zêl a. A hun atân February 14-17, 2019 ruat niin thupuiah ‘Pathian Hmangaihna’ tih thlan a ni. Logo mawi tak siam a ni a, programme tlângpui pawh duan a ni tawh. Inkhâwmpui thlengtu tûr TKP Tlabung Pastor Bial pawhin Organising Committee te dinin chak takin hma an la a. Sum mamawh thawh chhuah kawngah leh hmalâkna kawng tinrêngah Bial chhûng Kohhran leh Fellowship Organisation zawng zawng te, Tlâwmngai Pâwl leh Sawrkâr hotute thlengin phûr takin an thawkho a ni. An inbuatsaihnate enpuia tûl hrang hrang tiin MTKP hruaitute pawhin tum 4 zet an tlawh tawh a ni.

2.13. TKP bul tantu la damte inkawmhona buatsaih a ni dâwn.

July 30, 1951 zâna Sêrkâwn Sikulpuia Thalai Kristian Pâwl (TKP) bul tantu la dam, hriat theih chinah mi pasarih, te chu March 23, 2018 (Zirtâwpni) hian Aizâwlah zanriah buatsaihsakin inkawmhona (interview/symposium) neihpui tum a ni a. He inkawmhona hi thil pawimawh leh hlu tak, TKP documentary programme a nih dâwn avângin Thalai Êntu sum atanga buatsaih a ni ang a, uluk tak leh vawn that tlâka thla lâk (video coverage) tûr a ni. Mi pasarihte chu, Pu Lungruala, Laipuitlâng, Aizâwl; Pu C. Lalhnûna, Chaltlâng, Aizawl; Pu Remkunga, Tuikhuahtlâng, Aizâwl; Pi Laltani, Zêmabâwk, Aizâwl; Pi K. Liankhami, Bazar, Hnahthial; Upa J. Cherkûnga, Bazar, Hnahthial leh Pu Hrânghrima (Dr Lip), Kikâwn, Lunglei te an ni.

III. KHAWTLÂNG LEH RAM RAWNGBÂWLNA (diakonia):

3.1. HIV/AIDS veite tanpuina thawhlâwm hlan a ni.

‘MTKP huapin HIV/AIDS vei tanpui ngai zualte tanpuina tûrin Unit tin TKP inkhâwm vawi khat thawhlâwm hi MTKP-ah chhûn luh ni se’ tia MTKP Rorêlna 2017 thu chu ûm zuiin hemi puala sum lut tling khâwm atangin ` 20,000/- theuh hêngahte hian hlan a ni:

1) Gan Sabra, Aizawl.

2) Grace Society, Lunglei.

3) Synod Grace Home, Durtlâng.

4) Care & Support, Christian Hospital Sêrkâwn.

5) Peace Home, Aizâwl.

Hêng bâkah hian Mizorama Antiretroviral Therapy (ART) Centre awm zawng zawngah ` 10,000/- theuh hlan a ni bawk. Chûngte chu:

1) ART Plus Centre, Civil Hospital Aizâwl.

2) ART Centre, Kulikâwn, Aizâwl.

3) ART Centre, Civil Hospital Lunglei.

4) ART Centre, Civil Hospital Champhai.

5) ART Centre, District Hospital Kolasib.

6) ART Centre, District Hospital Mamit.

3.2. TKP Day thawhlâwm hmangin ram leh khawtlâng tân hna thawh a ni.

TKP Day 2017 thawhlâwm tling khâwm atanga a tam ber chu ram leh khawtlâng rawngbâwl nân hlan a ni. Hetiangin:

1) Chhawmdâwlna In (Boys Hostel sak tanpuina) pualin ` 1,00,000/-

2) Mizoram chhim lama Myanmar raltlânte tanpui nân ` 50,000/-

3) Ruihhlo do tanpuina ` 10,000/- theuh (Total ` 40,000/-)

(i) Central Young Mizo Association (CYMA), Aizâwl.

(ii) Sub Headquarters YMA, Lunglei.

(iii) Central Young Lai Association (CYLA), Lawngtlai.

(iv) Mara Thyutlia Py (MTP), Siaha.

3.3. A Thlâwna Thisen Pêk chhunzawm zêl a ni.

Nunna chhanhim nân leh mi mangangte chhawr theih tûrin khaw hrang hrangah TKP-ten thisen a thlâwnin kan pe thin a. Lunglei khawpui bîkah chuan Blood Bank lamin phâng lo leh chatlak lova kumtluana an dawn theih nân Blood Donation Calendar siam leh a ni. Tin, Lawngtlai Area lamah pawh LATKP hmalâknain khawpui chhûng Bial hrang hrangten thisen pêk beihpui hi an thlâk a. Aizâwl lamah pawh TKP Coordination Committee bultumin Blood Donation Camp buatsaih leh a ni.

3.4. Heroes Campaign hlawhtling taka neih a ni.

Mizoram State AIDS Control Society (MSACS) hmalâknaa Mizorama thalaite HIV laka an him a, thisen thianghlim hman tlâk neia regular taka thisen petu an pun zêl theih nâna buatsaih ‘Heroes Campaign’ chu October 18, 2017 khân Electric Kohhran Biak Inah tluang taka neih a ni a. MSACS-in thawhpuia min ngen angin Mizoram TKP chuan organising hna kan thawk a. Unit hrang hrang aiawh TKP hruaitu mi za rual zet an kal khâwm a ni.

3.5. Human Trafficking chungchâng leh Ruihhlo that lohzia inzirtîrna

Mizoram TKP Rorêlna 2017 thu passed ûm zuiin ‘Mihringa sumdâwnna chungchâng leh Ruihhlo that lohzia Inzirtîrna’ (Campaign against Human Trafficking & Drug Abuse) chu thuang 4 angin kalpui a ni.

1. a) Lehkhabu tê (booklet) siam a ni:

Human Trafficking chungchâng leh Ruihhlo that lohzia inzirtîrna lehkhabu tê (booklet) chhuah a ni a, TKP member-te zir tûrin Pastor Bial TKP Secretary copy 1 leh Unit tin copy 2 theuh thawn an ni.

1. b) Mobile Campaign hlawhtling taka neih a ni:

November 14, 15 leh 16 khân Champhai, Khawzâwl, Saitual/Keifâng (respectively)-ah te tluang leh hlawhtling takin Mobile Campaign neih a ni a. Community/YMA Hall-ah PPT presentation hmangin zirtîrna pêk a ni a, Local TV-ah te tihchhuah a ni. Khaw tinah hian kan Bial TKP hruaituten Bialtu Pastor-hovin ruahmanna fel tak nên min lo dawngsawng a, a lâwmawm takzet a ni.

1. c) Human Trafficking film siam a ni:

Human Trafficking film siam a ni a, he lam hawi film tlêm tê zînga mi leh Mizoramah phei chuan a pakhatna a ni. He film hi a siamna sênso phuhrûk nân man neia chhuahtîr a ni dâwn a. Chu chuan phalrai ngawt ai chuan mipui hlut pawh a hlawhtîr zâwk dâwnin he lama tawnhriat neiten an hria a ni. Chuti a nih chuan kan tum ber mipui zirtîr (conscientise) kawngah a hlawhtling zâwk dâwna hriat a ni bawk.

1. d) Thuziak tihchhuah:

Kum (age group) hrang hrangte human trafficking chungchâng zirtîrna pêk an nih theih nân Kohhrana fellowship hrang hrang chanchinbû leh local newspaper-ah a remchân angin thuziak (article) tihchhuah thin a ni.

3.6. Assembly thu ûm zuiin fa neih tam inzirtîr a ni.

Fa neih tam inzirtîr kawnga hmalâk thu, “BCM hian fa neih tam inzirtîr ni se, BCM Assembly-in MTKP kutah inzirtîrna hi dah se,” tia BCM Assembly 2017-in a rêl chu ûm zuiin fa neih tam inzirtîrna lam hawi activities nei tûrin Unit tinte ngen an ni a. Ngenna hi ngaipawimawhin Unit 231-in activities an nei thei a ni. Tin, fa neih tam chungchâng thuzir tûr pahnih buatsaih a ni a, Unit tinten an remchân huna an zir tûrin MTKP Thuzir 2018 (BCM Thurin Puanchhuah) bûah zeh tel a ni. Chûngte chu, ‘Fa neih tam thatna leh a pawimawhna’ tih leh, ‘Fa nei tam thei tûra hriat tûr pawimawhte’ tihte a ni.

Tlângkawmna:

Kum 2017-2018 chhûnga Mizoram TKP hmasâwnna rahbi min rahtîr a, rawngbâwlna hnûhmâ chhuanawm tak tak hnutchhiah theia min hruaitu Pathian hnênah ropuina awm se. A buatsaihtu tân pawha report pêk nuam tak buatsaih a nih theih nâna MTKP rawngbâwlna chelh dinga khal kaltu tlâng leh mual hrang hranga TKP member zawng zawngte chungah Mizoram TKP aiawhin lâwmthu ka sawi a ni. TKP hruaitu thahnemngai tak takte leh member inpe tak takte, Pathianin malsâwmin vêng zêl che u rawh se.

‘Krista leh Kohhran tân’

– Rev. Lianchhunga Khiangte

Kmin 2018 a MTKP rorelna a hmalakna tur hrang hrang an rel te -

1. MTKP hian kan Kohhran Thalaite leh zirlai naupang zawkte tan Career Guidance a kalpui theih nan hmalak nise.

2. MTKP Inkhawmpui thlengtu tanpuina member tina Rs 10/- khawn thin hi Rs 20/- ah tihsan ni se.

3. Kum 2018 MLA Election lo awm tura ram hmangaihtu dik tak kan thlan chhuah theih nan Unit tinah a huhovin TKP Day 2018 hian tawngtaina neih nise

4. Christian Hospital Poor Patient Fund atan Unit tinin fehchhuah thawhlawm vawikhat MTKP kal tlangin pek nise.

Mizoram Thalai Kristian Pawl te hi Fellowship Organization Department in Budget Ceiling a siam sak Nuai 10 chu Kum 2018 budget ah an pass a ni. Kumin MTKP rorelna ah hian rorel palai 463 an tel thei a ni.

Kan Unit aiawh rorel Palai tur in Pu Lalmalsawma Jongte kal in a ni hi Tv C. Zairemthanga'n a zui ve bawk a ni.